«على تاج الدين»، طالب في الصف الأول الثانوى، 16 عامًا، يعمل، بجانب دراسته، في محل «مكرونة» قرب مسكنه بمنطقة شبرا مصر، وفى الإجازة يساعد أسرته على ظروف المعيشة، وتوفير طلباتهم.
وفى يوم الواقعة، عاد «على» من عمله ليلتقى في طريقه أحد أصدقائه، وجلسا معا لبعض الوقت، ثم احتدم النقاش بينهما للحساب على «المشاريب»، وتطور النقاش لمشادة كلامية، وبعدها انتظره المتهم ولكمه في صدره، فسقط ميتا في الحال.
جريمة قتل طالب على يد صديقه بشبرا
وقال «تاج الدين»، والد المجنى عليه، لـ«المصرى اليوم»: «إحنا ناس على أد حالنا، ملناش في المشاكل وطول عمرنا ماشيين جنب الحيط، ابنى كان بيدرس وبيشتغل في أيام أجازته، علشان يساعدنا على المعيشة، من يومين سمعت من الجيران إن المتهم تشاجر مع ابنى بسبب خلافات على ثمن المشاريب، فتدخل الجيران لفض الشجار بينهما فقال له «على»: «أنا مليش دعوة بثمن المشاريب»، فرد عليه المتهم: «انت خسرت ولازم تدفع تمنها» وبعدها ذهب كل منهما في طريقه.
وأضاف تاج الدين لـ«المصرى اليوم»: «قبل حدوث الواقعة، على مكنش بيروح المدرسة باستمرار وكان بيروح الشغل في محل المكرونة، وقبل ما ينزل من البيت سألته عن اللى حصل بينه وبين مودى، فقال: «هو عايزنى أدفع ثمن المشاريب لكن أنا ملعبتش على حاجة، واتخانقنا مع بعض والناس حجزتنا، وقتها قلت خناقة عيال مع بعض، ومتوقعتش إن الموضوع يوصل للقتل، وبعدها حاولت أوصل للمتهم علشان أحل الخلاف معاه، تفاجأت بـ3 أشخاص من بينهم المتهم بيسألوا على بيت ابنى فقلت له: (أنا والده في حاجة حصلت معاه) فرد المتهم قائلًا: (أنا ليا فلوس عند ابنك ثمن المشاريب في القهوة)، فقلت له: (حاضر هديك اللى انت عايزة)، وبعدها مشيوا».
وأوضح والد الضحية: «تلقيت اتصالًا هاتفيًا من أحد الجيران قائلًا: «الحق يا أبوعلى ابنك مات، ومرمى في شارع أحمد بدوى، على الفور ذهبت إلى هناك ولقيت الأهالى حواليه وهو مرمى على الأرض ورجال الشرطة واقفين لحضور النيابة العامة، فدخلت عليهم قولتهم: ده ابنى على، بس لقيته قاطع النفس، ونقلناه مستشفى شبرا العام لكنه لفظ أنفاسه الأخيرة، وتم نقله إلى مشرحة زينهم».
تابع: «عرفت إن المتهم انتظره بجوار المنزل، واعتدى عليه، وسدد له لكمة في الصدر أنهت حياته في الحال.. المتهم قتل ابنى بسبب رفضه دفع حق المشاريت.. بس حقه هيرجع علشان إحنا غلابة، مش هقول غير حسبى الله ونعم الوكيل».
وتلقت الأجهزة الأمنية بمديرية أمن القاهرة، إخطاراً من قسم شرطة شبرا تضمن ورود إشارة من المستشفى العام تفيد باستقبال طالب جثة هامدة، بادعاء مشاجرة مع صديقه. وألقت أجهزة أمن القاهرة القبض على الطالب المتهم، وبمواجهته أنكر قصده قتل زميله، غير أنه أقر بحدوث خلافات بينهما، فسدد لكمة له في صدره، ولم يكن يتوقع أن تسقطه مغشياً عليه. تحرر المحضر اللازم، وتم اتخاذ الإجراءات القانونية حيال الواقعة.
