أقامت زوجة دعوى أمام محكمة الأسرة ضد زوجها؛ تطلب فيها «الطلاق للضرر»، بحجة أنها لم تتحمل العيشة معه لاتفاقه مع والدته عليها.
وقالت المدعية أمام محكمة الأسرة: «حماتى عايزانى أساعدها فى تربية أبنائها وأكون مسؤولة عن تنظيف شقتها وإعداد الغداء يوميا، وحرمتنى من الجلوس فى شقتى، ويوميا تجبرنى هى وزوجى على النزول إلى شقتها بالطابق الأرضى فى الثامنة صباحا، حيث إننى أعيش معهم فى بيت عيلة، وعندما اشتكيت لزوجى قالى (لو عايزه تعيشى فى أمان لازم تخدمى أمى)».
وأضافت الزوجة: «تزوجت بعد ٩ أشهر من الخطوبة نظرا لوجود صلة قرابة بيننا، وكان الاتفاق إننا هنسكن فى بيت العائلة مع الاحتفاظ بخصوصيتى، وعقب الزواج بدأت حماتى تطلب منى أساعدها فى أمور البيت، بحجة إن أولادها عندهم امتحانات وهى بتذاكر لهم، ولكن مع مرور الوقت بدأت تطلب منى بشكل يومى، وطلباتها بقت كتير على، بقيت أشعر بالتعب وطلبت من جوزى إنه يقولها تخف طلباتها شوية علشان أنا مكسوفة أقولها بنفسى».
وتابعت: «اتفاجئت بإن جوزى بيقولى أمى طول عمرها تعبانة، وأنا متجوزك عشان تخدميها عشان إخواتى صغيرين ومحتاجين اللى يراعيهم، وأمى صحتها بقت على قدها، وبدأ يتجاهلنى لما بقوله تعبانة ومش هقدر أنزل لها، وحماتى وولادها بقوا يخاصمونى طول الوقت.. زوجى تشاجر معايا وصفعنى على وجهى، فحكيت لأهلى على اللى بيحصل معايا، وحاولوا يتكلموا معاه، لكنه أصرّ على موقفه، فطلبت الطلاق منه؛ فرفض، فاضطررت إلى إقامة دعوى طلاق للضرر».
