«جوزي طلقني ورماني وتخلى عن بناته التلاتة بعد 11 سنة جواز».. بحسرة وحزن تروي ربة منزل (35 عامًا) أمام محكمة الأسرة، دوافع إقامتها دعوى نفقة صغار ضد والد بناتها (موظف، 41 عامًا) الذي تزوج عليها من أخرى بدافع إنجاب الولد.
وأضافت الزوجة السابقة في دعوى النفقة أمام محكمة الأسرة: «جوزي قلبه زي الحجر، رافض يبعت مصاريف لبناته، وبيشتري لبن العصفور لإبنه من مراته التانية، وبيعتبرنا موتنا من بعد ما ربنا رزقه بالولد االلي كان نفسه فيه».
المُدعية: «جوزي هيتجنن واخلف له ولد»
وتضيف المُدعية خلال نظر دعوى نفقة صغار أمام محكمة الأسرة: «اتجوزته من 11 سنة وحملت بعد الجواز على طول، وربنا رزقني ببنت، جوزي مكنش فرحان؛ عشان كان نفسه في ولد، وأصر إني أحمل تاني بسرعة، على أمل أخلف ولد، فحملت تاني بعد سنة، وإردة ربنا إني أخلف بنت تاني، فجوزي كان بيتعامل معايا كأن في بيتنا ميت، ورافض يلاعب البنات أو يشيلهم، وكان يادوب بيوفر لنا أساسيات الحياة، رغم إن حالته المادية كويسة».
سيدة أمام محكمة الأسرة: «بعد 4 سنوات زواج بقى يقولى عبارات غير لائقة»
الزوجة السابقة: «اتجوز عليّ عشان الولد»
وعن فترة زواجها وتحملها الكثير من أجل البنات، قالت الزوجة السابقة: «استحملت معاملته السيئة لي أنا والبنات، وكنت بدعي ربنا يرزقني بولد؛ عشان جوزي كان حالف إنه هيتجوز واحدة غيري، لو خلفتِ التالتة كانت بنت تاني، وربنا أراد الخلفة التالتة تكون بنت، وبعد 5 شهور من آخر ولادة لي جوزي اتجوز عليّ، فاضطريت أعيش معاه عشان البنات مايتبهدلوش، وكمان أهلي حالتهم المادية على قدها».
اقرأ أيضًا : سيدة أمام محكمة الأسرة: «طالب والدتي بدفع ثمن الكشف والسونار»
واستطردت المدعيّة في صحيفة دعواها: «بعد ما ربنا رزقه بالولد من مراته التانية، بقى يتعامل معايا أنا والبنات كأننا مش موجودين، بيرفض يوفر لنا معظم أساسيات الحياة، ويشتري لمراته التانية وابنه كل حاجة، وقالي انزلي اشتغلي عشان تصرفي على بناتك، ومبقاش يعدل بينا في الأيام، واتأكدت استحالة العيشة معاه على الوضع ده، فاتطلقت منه عن طريق محكمة الأسرة بعد ما رفعت دعوى طلاق للضرر، وأخذت حقوقي منه، ودلوقتي جه الدور عشان أخد حق بناتي من أبوهم، فاضطريت أرفع دعوى نفقة صغار».
