كشف تحقيق النيابة العامة تفاصيل جديدة في قضية مقتل الشاب خالد التميمي، شقيق محامِ شهير، على الطريق الدائري بمنطقة الخصوص بمحافظة القليوبية، وحصلت «المصري اليوم» على نص اعترافات المتهم الرابع في القضية، «محمود.ع»، الصبي البالغ من العمر 16 عامًا، سائق «توك توك» والذي أقرّ بدوره في الجريمة التي بدأت بسلسلة من عمليات السرقة على الطريق الدائري، وانتهت بإطلاق النار على الضحية.
اعترافات المتهم الرابع في قضية قتل شقيق محامِ على الدائري بـ الخصوص
بحسب أقواله، التقى المتهم بمجموعة من أصدقائه قبل 10 أيام من وقوع الجريمة حيث انطلقوا على متن «توك توك» نحو الدائري بغرض «السرقة»، قبل أن تتطور الأحداث عندما استهدفوا الضحية محاولين سرقة حقيبته، موضحًا في اعترافاته أن المجني عليه حاول التشبث بممتلكاته، ما دفع أحد أفراد العصابة إلى الاعتداء عليه جسديًا، قبل أن يُطلق عليه رصاصة في صدره، أردته قتيلًا في الحال.
قال المتهم الرابع في جريمة القتل على الطريق الدائري أمام النيابة: «اللي حصل بالظبط إن من حوالي ١٠ أيام كان يوم موافق يوم ثلاثاء لقيت (خالد.ع) وشهرته (توهان) و(إسلام.ع)، عدوا عليا عند البيت في بهتيم وخدوني معاهم في (التوك توك) وروحنا عدينا على (على.م) شهرته (بصلة) في مسطرد علشان ناخده وتطلع ع الدائري نشتغل، وبعدها طلعنا إحنا الأربعة على الدائري ولفين من عند نزلة المرج، ووقتها لقينا مكنة موتسيكل عليه ۳ فقربنا منه ولقينهم (أحمد.ر) و(يوسف.إ)، و(خالد.ع)، و(أحمد.ر) وشهرته (بوقه) مأخدش باله مننا وقتها ورفع الفرد علينا بس (مصطفى بصلة) طلع من (التوك توك) وقاله: (متخفش يا بقو أنا بصلة)، وقربنا من بعض سلمنا على بعض».
وأضاف المتهم في قضية الخصوص: «بعدين وقفنا عند الخصوص، و(أحمد) و(مصطفى) قالوا يلا نشتغل مع بعض تسرق موبايلات وكنا جنب بعض وفضلنا رايحين جايين على الدائري اكثر من مرة لحد ما سرقنا إحنا موبايل من واحد، واللي سرقه مننا كان (مصطفى بصلة)، وكان (أحمد.ر) والرجالة إللي معاه سرقوا 3 موبايلات واتقابلنا عند نزلة مسطرد، واتفقنا إن كفاية كدة وإننا هنروح بعد كده هنبيع الحاجة ونقسم الفلوس، بس أول ما نزلنا لقينا (أحمد.ر) واللي معاه مشيوا بالمكنة على الطريق المقابل لينا».
كيف وقعت جريمة القتل في الطريق الدائري؟
وكشف المتهم الرابع عن دوره في الجريمة، قائلًا: «ووقتها (أحمد) شاف واحد ماشي لوحدة قدام شوية راح قال بصوت عالي يلا يا مصطفى ناخد الواد دا بالإكراه وإحنا مروحين وبعدها ع طول نزل اتكلم مع الراجل ومسمعناش هما بيقولوا إيه، وبعدها لقينا (أحمد) بينتش الشنطة من على صدر الراجل ورفع في وشه الفرد بس الراجل مكنش راضي يسبب الشنطة وفضل ماسك فيها جامد، وشوفت (أحمد) وهو بيضربة أكثر من ضربة بجسم الفرد على دماغه من ورا وقفاه».
اختتم أقواله: «والراجل كان برضو ماسك في الحاجة جامد، راح (أحمد.ر) حط الفرد على صدره وضربه طلقة والراجل وقع في الأرض، وفي الواقت دا بصلة نزل من (التوك توك) عدى لنص الطريق وكان فيه ناس بالعربيات بتهدي علشان تقف راح (مصطفى بصلة) ضرب طلقة في الجو علشان نعرف نهرب، ووقتها هربنا وبيعنا الحاجة وكان نصيب كل واحد فينا ۱۲۰۰ جنيه، وروحت بيتنا وبعدها بحوالي 3 أيام لقيت المباحث جم خدوني من بيت أختي ودا كل اللي حصل».
