«اللي أنقذ بنتي وبنت أختي إنهم اترموا بره الميكروباص لما التريلا خبطته،لكن 3 من بنات إخواتي ماتوا قدامي»، هكذا قال والد حبيبة الجيوشي، أول مصابة تخرج من المستشفى في حادث الطريق الإقليمي بالمنوفية.
وأضاف الأب : حبيبة بنتي 18 سنة، كانت رايحة الشغل في مزرعة عنب من كفر السنابسة، زي عشرات البنات اللي بيكافحوا علشان يساعدوا في مصاريف البيت، لكن الميكروباص اللي كانت فيه اتصدم من تريلا مسرعة قرب مدينة أشمون، والكارثة حصلت، وبنتي نجت بس قلبي مات 3 مرات.
وتابع :« بنتي فاقت وهي على الأرض، مش فاكرة من الحادث حاجة، بس لما صحيت لقت نفسها وسط الصراخ والجثث.. ولاد إخواتي راحوا، وحبيبة رجعت، بس مش هترجع زي الأول».
يذكر أن حادث الطريق الإقليمي بالمنوفية وقع الجمعة الماضي بعد اصطدمت تريلا بميكروباص يقل 22 فتاة متجهات للعمل، فلقى 19 منهن مصرعهن، وأصيبت 3 أخريات إصابات بالغة، وتم نقلهن إلى مستشفيات أشمون العام وقويسنا والباجور.
ومن بين المصابات الثلاث حبيبة، التي خرجت من المستشفى، وآيات وهدير ، ما زالتا تحت المتابعة، وحالتهم وُصفت بـ «الحرجة جدًا »، بحسب مصدر طبي بالمستشفى.
وامرت النيابة العامة بحبس سائق التريلا 4 أيام على ذمة التحقيق، وإجراء تحليل مخدرات له، بعد ما أكدت التحريات الأولية أنه تجاوز السرعة وتسبب في الحادث نتيجة تهور واختلال بعجلة القيادة.