الواقع اون لاين - دشّن طلاب التعليم الفني جروب باسم تمرد طلاب التعليم الفني من خلال هاشتاج باسم طلبة_الدبلوم_مش_فشله ولا_لتنسيق_الدبلومات_والمعاهد_الفنية_التنسيق_لازم_ينزل".

وناشد طلاب التعليم الفني عن طريق جروبهم الدكتور طارق شوقي وزير التربية والتعليم والتعليم الفنى، قائلين: "احنا طلبة الدبلومات والمعاهد الفنية وبصراحة التنسيق جه السنة اللي فاتت عالى أوى عن كل السنين اللى فاتت ومفيش أى اهتمام من الوزارة ولا حتى عايزه تحاول أنها تحل مشكلتنا".

وأضاف الطلاب: " الوزارة اللى قالت التعليم الفنى نهضة للمجتمع طب إزاى وهما رمونا آخر حاجة فى التنسيق وخلونا بعد الثانوية العامة والشهادات المعادلة والـ ig والشهادات الأزهرية لغاية ما اكتفوا بامكانهم فى الكليات وخلّونا إحنا كماله عدد فى الآخر وعلو علينا التنسيق إحنا أهو اتعلمنا وهما اللى قضوا على حلمنا نقول إيه للأجيال اللى جايه نقولهم اقتلوا حلمكم بإيدكم قبل مايصحوا ويلاقوا الواقع حاجة تانية".

واستكمل الطلاب: "والله العظيم أغلبيتنا بنفكّر نسافر ونسيب البلد دى اللى حقنا ضايع فيها ومحدش عاملنا اهتمام خالص"، مطالبين الوزير بزيادة عدد مقاعد الدبلومات والمعاهد الفنية في الجامعات، قائلين: " زمان كان اللي بيجيب ٧٥٪ بيدخل كلية من ٥سنين، هما غيروا النظام علشان الجامعات الخاصة تشتغل".

واختتم الطلاب رسالتهم بأنه على الرُّغم من سوء النتيجة والظلم الذي حدث بها، لكن طلبة التعليم الفني ليسو فشلة، ولهم الأحقيّة في معظم الكليات مثل طلبة الثانوية العامة، وتابع:"طالب الثانوية الذي ينجح من الدور الثاني يدخل كليات مثل التجارة والحقوق، وطالب التعليم الفني الحاصل ع مجموع 90% لايدخل أي كلية فهناك ظلم، مطاليين الوزير بوضع بعض الكليات لطلبة الدبلومات والمعاهد الفنية ونزول التنسيق عن العام الماضي لأن بعض الطلاب لم يدخلوا أي شئ بسبب ارتفاع التنسيق، مطالبين بزيادة نسبة دخول الطلاب الجامعة من 10% - 20%.