تواصل «المصري اليوم»، نشر اعترافات «محمد.خ»، سائق ميكروباص، المتهم الأول بالقضية المعروفة إعلاميًا بـ حادث غرق ميكروباص معدية أبوغالب، والذي أسفر عن مصرع 16 فتاة وسيدة وإصابة 4 أخريات، إثر سقوط سيارة الأجرة في مياه نهر النيل، بسبب نزول السائق من سيارته والاشتباك مع شباب عاكسوا فتاة كانت تستقل سيارته، حسب أقواله ونص التحريات الأمنية.
نص اعترافات سائق ميكروباص معدية أبو غالب
المتهم الأول، في الجزء الثالث من اعترافاته بالقضية التي تضم 5 متهمين بينهم رئيس مركز ومدينة منشأة القناطر، التي تنشرها «المصري اليوم»، قال إنه اختار الطريق محل الحادث لأنه «أسرع وأقصر»، مشيرًا إلة أنه «هو فيه طريق بري بديل مفهوش معديات بس أطول بكتير.. وبياخد ساعة زيادة في الطريق»، واصفًا حال «معدية أبوغالب» بأنها «الحواجز القدام واللي ورا مش شغالين».
س: ما هي آخر مرة قمت فيها بفحص السيارة فنيًا قبل الحادث محل التحقيق؟
ج: مش فاكر بس كان من قريب.
س: وفيم تستخدم تلك السيارة؟
ج: أنا بشتغل عليها سواق وبنقل فيها ركاب.
س: أتستعين بثمة أشخاص في العمل بتلك السيارة ؟
ج: لا، أنا شغال عليها لوحدي.
س: وكم راكبًا تتسع له سيارتك؟
ج: الميكروباص بتاعي حمولة ١٤ راكب.
س: أمن خط سير معين تعمل به؟
ج: أيوة، في موسم العنب اللي احنا شغالين فيه دلوقتى ده أنا باخد البنات اللي بتشتغل في مزارع العنب من سنتريس- المنوفية أوصلهم لحد قرية أبوغالب منشأة القناطر.
س: ما هي نقطة بدايته؟
ج: قرية القناطرين وقرية سنتريس بمحافظة المنوفية.
س: وما نقطة نهايته؟
ج: مزرعة الوفرة لتصدير العنب الكائنة مدق الثورة اتجاه سجن القطا قرية أبوغالب منشأة القناطر محافظة الجيزة.
س: ما المدة الزمنية التي تستغرقها الناقلة في عبور النيل بين ضفتيه بذلك المكان؟
ج: حوالي ٥ أو ٧ دقائق.
س: ما الطريق الذي تسلكه ذهابًا وإيابًا بين نقطتي السير هاتين؟
ج: أنا بطلع من بيتنا على نص طريق قرية القناطرين بجوار مسجد المدينة المنورة وينزل بها موقف القناطرين يحمل من هناك حوالي ١٠ أو ۱۳ بنت وبعد ما باخدهم يطلع بيهم سنتريس أحمل من هناك بنات ثانيين وبعدها بروح عزبة الرافعي أخد برضو بنات من هناك وبعدها بطلع على طريقي اتجاه الجيزة مرورًا بقرية سبك الأحد وأشمون وكوبري العزباوي اتجاه أبوغالب وبعدها المعدية الأولي بتنقلنا من أشمون للجيزة على فرع دمياط، وبعد ما ينزل في الجيزة بتروح للمعدية الثانية (معدية محطة أبوغالب) اللي حصلت فيها الحادثة. ودي بتنقلنا من البر الشرقي للبر الغربي وبعد ما ينزل من المعدية الثانية بمشي اتجاه ميدان أبوغالب وسجن القطا ومنه مدق الثورة لحد ما أوصل المزرعة العنب اللي بيشتغلوا فيها البنات.
س: كيف تعبر ضفة نهر النيل من محافظة المنوفية إلى الضفة الآخري بمحافظة الجيزة.
ج: إحنا بتعدي النيل عن طريق المعديات اللي موجودة في النيل.
س: أمن ثمة طريق بديل متاح لك سلوكه بلوغاً لوجهتك بمحافظة الجيزة غير ذلك الطريق؟
ج: هو فيه طريق بري بديل مفهوش معديات بس أطول بكتير، وبياخد ساعة زيادة في الطريق.
س: وما سبب تخيرك للطريق الذي يشمل عبور نهر النيل؟
ج: لأنه أسرع وأقصر.
س: كم عدد الناقلات التي تعبر باستخدامها قادماً من محافظة المنوفية وصولاً إلى قرية أبوغالب؟
ج: أنا بركب معديتين المعدية الأولى من أشمون للجيزة والمعدية الثانية من البر الغربي لأبوغالب للبر الشرقي والعكس ودي اللي حصل فيها الحادثة النهاردة.
س: ما هي مواصفات تلك الناقلة المعدية التي وقع بها الحادث؟
ج: هي زي مركب حديد كبير ولها منزل ومطلع من قدام ومن وراكل واحد فيهم بينزل علشان يركب العربيات أو يطلعها وبيترفع لما المعدية تمشي في المياة.
س: فيم تستعمل تلك الناقلة؟
ج: نقل الركاب والسيارات.
س: ما هي الأجزاء المكونة لهيكل تلك الناقلة؟
ج: هي بتتكون من مسطح كده بتتطلع عليه العربيات وبيبقى فيها حواجز حديد من الجنبين اليمين والشمال وفيها مكنتين سحب متوصل بأسلاك بيسحبوا المعدية من البر ده للبر الثاني وفيها قطعة حديدية بتستخدم كمطلع ومنزل في مقدمة المعدية ونهايتها.
س: أمن عطب ألم بأيًا من الأجزاء المكونة لهيكلها؟
ج: أيوة، الحواجز القدام واللي ورا مش شغالين هما المفروض بيترفعوا لما المعدية بتتحرك بس عطلانين وبيفضلوا علطول نازلين.
س: وما هو خط سير تلك الناقلة؟
ج: هي لها خط سير ثابت رايح وراجع من البر الغربي للبر الشرقي قرية أبوغالب.
س: ما المكان الذي أبحرت منه الناقلة؟
ج البر الشرقي لقرية أبوغالب.
س: وأين كانت وجهتها؟
ج: البر الغربي لقرية أبوغالب.
س: من هو شخص قائدها؟
ج: أنا معرفش اسمه، بس هو بيبقي فيه واحد قاعد على مكنة السحب.
س: وما هو دوره تحديداً؟
ج هو بيبقي قاعد على مكنة السحب بيحرك المعدية وبيتحكم في سرعتها.
