وقفت أمام خبراء مكتب التسوية بمحكمة الأسرة وقالت: رفضت أعيش معاه في الحرام، فكان جرائي يبهدلني ويخليني أجري ورا حق ولادي في المحاكم.. بهذه الكلمات بدأت ربة تحكي تفاصيل دعوي النفقة التي أقامتها أمام محكمة الأسرة بالقاهرة بعد طلاقها تطلب فيها نفقة لأطفالها الثلاثة والذي إمتنع والدهم عن الإنفاق عليهم لقرابة عام بعد وقوع الطلاق.
قالت المدعية في دعواها أمام محكمة الأسرة طلبت الطلاق بعدما إشتدت الخلافات بينها وزوجها بسبب طبيعة عمله التي كانت ترفضها رفضًا مطلقًا، فقد قرر بجانب عمله في تجارة الأدوات الصحية أن يعمل في «توظيف الأموال» مع أحد أصدقائه الذي أقنعه أن يعمل معه في هذا المجال ويحصل على أموال من الناس لــ «إستثمارها» في تجارة الذهب مقابل أرباح شهرية يحصل عليها صاحب المال وكذا هو وصديقه بنسب متفق عليها مسبقاً.
وأضافت صاحبة الدعوي أمام خبراء التسوية بمحكمة الأسرة: من ساعة ما قاللي على الموضوع ده وهو لسه مجرد فكرة، وأنا بقوله الشغلانة دي خطر وأخرتها وحشة ده غير إن فيها شبهة حرمانية، وأنا من عاسزة أعيش أنا وولادي بفلوس حرام. لكن هو ماكنش قابل أي كلام مني وكان مقتنع جدا بكلام صاحبه وشايف إنه كده بيأمن مستقبلنا ومستقبل ولاده وإن الشغلانة دي هتبقي بجانب شغلته في تجارة الأدوات الصحية, وإنه حتي لو خسر فيها هتفضل تجارته زي ما هي مش هتتأثر, لكن أنا ماكنتش مصدقة وكل قناعتي إن أخرة الموضوع ده وحشة.
وقالت مقيمة الدعوي أمام محكمة الأسرة: إصرار جوزي على الدخول في الشغل ده قلب حياتنا كلها، أنا ماكنتش قادرة أتحمل حياتي معاه وهو كل يوم بيكلم حد ويقعد يكلمه عشان يقنعه يديله فلوسه يشغلهاله مقابل أرباح مغرية، لحد ما في يوم قولتله في وشه «لو مارجعتش عن اللي إنت بتعمله ده هبلغ عنك إنت وصاحبك» , فكان رده سب وإهانة وإنه مد إيده عليا ورمي عليا يمين الطلاق وطردني من بيتي.
ما فرقش معايا كل ده، لكن إنه يفضل 11 شهر ما يبعتش لولاده ولا جنيه يعيشوا بيه، ده اللي خلاني أقرر أجي المحكمة وأرفع قضية النفقة مش لأي سبب غير إن ده حق ولادي ومش هسيبه – إختتمت المدعية بهذه الكلمات دعواها بمحكمة الأسرة بالقاهرة -.
