رحل المذيع والفنان عمرو سمير عن عالمنا، أمس الأربعاء في إسبانيا، مما جعل رحيله مفاجئ لأصدقائه وجمهوره، ومن بينهم الفنانة سلمى الصباحي التي شاركته أولى خطواتهما الإعلامية في برنامج «شبابيك» على قناة «دريم».

وقد شاركت سلمى جمهورها بمجموعة من الصور مع عمرو سمير وعلقت عليها بكلمات مؤثرة قائلة:«عمرو.. يابو ضحكه جنان مابتفارقش وشك.. يابو قلب طفل بكل براءته وطيبته وعناده وغضبه وسذاجته وصراحته.. دايما كنت باعتبرك أخويا الصغير وعشان كده أنا وإنت كنا قريبين وماكناش بنتخانق..».

وتابعت: «كنت بتشترك معايا في حب فيروز وكنت بتحب صوتي ولما كان يبقى عندي حفله تختار معايا هاغني ايه لفيروز وتطلع في البرنامج تقول سلمى عندها حفله يوم الجمعه وكلنا هانكون هناك وهانستناكو.. كانوا الناس بييجوا عشان يشوفوك يا عمرو.. كنت جاري وكتير كنت بتوصلني بعد البرنامج وانت اللي علمتني اقول أذكار المساء وإحنا مروحين في الطريق كنت تقول وانا أقول وراك.. ماكنتش تفوّت فرض وكنت بتحب الحياه اوي يا عمرو معقول تمشي كده!».

وفي الختام قالت: «يا عمرو الناس كلها بتحبك وبتدعيلك وحزينه أوي عليك.. ربنا يرحمك رحمه واسعه على أد قلبك الطفل وتكون في الجنه يارب.. شبابيك من غيرك قلّ كتير.. والدنيا من غيرك بهجتها هاتقل يا عمرو.. مع السلامه ياخويا..اختك سلمى».

الجدير بالذكر أن عمرو سمير قد توفى عن عمر ناهز الـ33 عامًا، أمس الأربعاء في إسبانيا أثناء نومه، بعد يومين فقط من الاحتفال بعيد ميلاده، بسبب إصابته بسكتة قلبية ومن المقرر أن يعود جثمانه من أسبانيا للقاهرة اليوم.