كشفت سارة عصام، لاعبة منتخب مصر للشباب لكرة القدم النسائية، تحت سن 18 سنة، والمحترفة ضمن صفوف فريق ستوك سيتي، تفاصيل تعاقدها مع النادي الإنجليزي، موضحة أنها سعيدة بهذا الإنجاز بعدما حققت أكبر حلم لها.
وأضافت سارة فى تصريحات تلفزيونية : «شاركت بشكل رسمي من شهر، وأول مباراة ودية أحرزت فيها هدفا.. هي حاجة جديدة وخطوة صعبة إني أسيب بلدي وآجي ألعب هنا بس تجربة تستاهل».
وتابعت: «تأقلمت مع بقية أفراد الفريق، والموضوع كان صعبًا في الأول بسبب الثقافة المختلفة، هما كانوا متخوفين ومستغربين إني بنت في مصر بتلعب كرة، وكانوا بيسألوني انتوا عندكوا ملاعب في مصر زينا، وكنت طبعا بحسن الصورة بتاعتنا وبقول آه طبعا عندنا».
واستكملت سارة: «الإمكانيات في البلد مختلفة، لإنهم بيهتموا بالكرة النسائية والملاعب، وكل المباريات بتتذاع، وده مبيحصلش في مصر، إضافة إلى فرق الطقس عندهم برد جدًا وفي مصر شديد الحرارة، بس بحاول أتعود».
وعن فرق التدريب والتمرينات: «الكرة كرة سواء في مصر أو في أي بلد تاني، بس ممكن يكون في بريطانيا الموضوع مختلف والتمرينات أقوى شوية»، مؤكدة أنها لن تترك دراستها في الهندسة لأن أي لاعب يمكن أن يترك كرة القدم بسبب الإصابات.
وأكملت: «بطلت عصبية رغم أني كنت بتحرم من ماتشات دولية في مصر بسببها، بس هنا بيقدروا اللعب الكويس ومبيزعلوش من الخسارة ومحدش بيتعاقب، لكن في مصر الخسارة بتبقى صعبة وليها عقاب».
وكان نادي ستوك سيتي، تعاقد مع سارة عصام، لتصبح أول لاعبة مصرية تحترف في صفوف أحد أندية الدوري الإنجليزي الممتاز البريميرليج.
