رمضانك أجمل بالوعي.. الأوقاف تحذر من الوقوع فريسة للنصب الإلكتروني!
مع إنتشار حالات النصب الإلكتروني مؤخرا، حذرت وزارة الأوقاف من الوقوع فريسة لمافيا هذه الشبكات التي تستغل حاجة الناس وطمعهم في المكسب السريع.
المؤمن كَيِّس فَطِن
وتابعت الوزارة عبر موقعها الرسمي ب«الفيسبوك»: في شهر رمضان، بنحاول نقرب من ربنا ونحسّن أخلاقنا، ومن أهم الحاجات اللي لازم نركز عليها الوعي والحذر من الوقوع في فخاخ النصب الإلكتروني، لأن المؤمن كَيِّس فَطِن، يعني ذكي ويعرف يميز الصح من الغلط، وما حدش يقدر يضحك عليه!
ليه ناس كتير بتقع في النصب الإلكتروني؟
وأوضحت: المحتالين من خلال عمليات النصب الإلكتروني ما بيسرقوش بالقوة، لكن بيستغلوا الطمع في الفلوس السهلة والرغبة في المكسب السريع، وبيقدموا عروض خادعة زي: حط 1000 جنيه وهتكسب 10,000 في أسبوع!، مبروك! كسبت جايزة كبيرة، اضغط هنا!، وظيفة بمرتب خرافي من غير خبرة!
الرزق السريع مقامرة
وشددت الوزارة: لكن الحقيقة إن دي كلها أوهام، والمكسب السريع ده مش رزق حلال، ده مقامرة على فلوسك وقوت عيالك!، وسيدنا عمر بن الخطاب -رضي الله عنه- قال جملة عظيمة: "لستُ بالخبّ، وليس الخبّ يخدعني". (أدب الدنيا والدين)، يعني مش بغش حد، بس كمان محدش يقدر يغشني!
خليك واعي واشتغل بجد!
وقدمت الوزارة الحل: بدل ما تدور على الربح السريع اللي في الآخر خسارة، استثمر في نفسك وطوّر مهاراتك، هو ده الطريق الصح لزيادة دخلك: اتعلم مهارة جديدة زي التصميم، البرمجة، التسويق، أو أي حرفة مفيدة، اشتغل بجد واتقن شغلك، وربنا هيباركلك في رزقك، ما تجريش ورا أي عرض مش واضح، واسأل وتأكد قبل ما تحط فلوسك في حاجة ما تعرفهاش.
الخلاصة
واختتمت: رمضان فرصة للتغيير، فخلّي عندك وعي يحميك، وما تسمحش لحد يستغفلك أو يسرقك!، شارك البوست علشان غيرك يستفيد، والتوعية في حد ذاتها عبادة!
:
«الأوقاف» عن «الألعاب النارية»: الإسلام ينهى عن ترويع الآمنين فى الشوارع
«خليك في عون غيرك».. وزارة الأوقاف تدعو إلى التكافل والتراحم في رمضان
وزارة الأوقاف: «المقالب مش هزار.. والأذى مش شطار»
