19 عاما قضاها عويضة سليمان خلف أسوار السجن بعد اتهامه فى قضية مخدرات كانت تلك السنوات له درسا كبيرا، حتى لا يعود إلى السجن مرة أخرى عويضة داخل السجن لا يعرف القراءة أو الكتابة، لكن بالإصرار والعزيمة حصل على الثانوية العامة، التقى صدى البلد السجين لرصد قصته.

يقول وسط حالة من الفرحة: أنا من مدينة الإسماعيلية دخلت السجن أنا وشقيقي فى قضية مخدرات واتحكم علينا بالمؤبد، بس أنا ماستسلمتش لسنين السجن وصممت إنى أتعلم وأكمل الدراسة لحد ماحصلت على الشهادة الثانوية وحفظت ١٠ أجزاء من القرآن، ماكنتش أعرف القراءة أو الكتابة التحقت بفصول محو الأمية وبالإصرار والعزيمة حصلت بعد ذلك على الشهادة الابتدائية ولم أكتف بذلك ولكن أكملت المسيرة حتى حصلت على الثانوية العامة من داخل السجن.

١٩ سنة وأنا بتعلم داخل السجن والحمد لله تم تكريمى من قبل اللواء زكريا الغمرى مساعد وزير الداخلية لقطاع السجون خلال الاحتفالية.

واستكمل حديثه: "السجن كل يوم بيطور عن اليوم اللى قبله، قيادات السجن هنا بتساعدنا علشان نكون مواطنين صالحين .. مش ناقصنا حاجة جوة السجن عندنا مستشفيات بنتعالج فيها ومصانع ومزارع بنشتغل فيها وبناخد مرتبات ومكتبات علشان نذاكر فيها ونمتحن كمان وناخد شهادات".

وأضاف عويضة: "أنا أب لـ٥ أطفال وصدر حكم عليا أنا وأخويا فى قضية اتجار وضاع من عمرى ١٩ عاما بعيدا عن أبنائى .. أول حاجة هعملها لما أخرج أعلم ولادى يبعدوا عن أى حاجة غلط ويخلصوا فى شغلهم" ووجه عويضة رسالة للرئيس عبد الفتاح السيسي، قائلا: "ربنا يخليك لينا ياريس ودايما فى تقدم".

وكانت وزارة الداخلية أقامت حفل صباح اليوم بمناسبة الإفراج عن ٦٩٣١ سجينا وغارما وغارمة بمناسبة ذكرى عيد الشرطة وثورة ٢٥ يناير.